"PANTOMINA SA TINAMPO" asin iba pa.....

Maogma asin ma-kolor an naging selebrasyon kan Kasanggayahan Festival sa taon na ini.Ginibo sanang simplehonon an mga aktibidadis, kumpara sa mga nakaaging selebrasyon an Kasanggayahan Festival 2004. An tema kan selebrasyon ngunyan iyo an "Patibayon an Sadiring Istorya asin Kultura", sa pangengenot kan Kasanggayahan Foundation na pinamayuhan ni Msgr.Francisco Monje.

Oktubre 23,2004 aldaw nin Sabado, pinuonan an aldaw na ini kan karera kan mga sakayan na pig apod na "Bankarerahan 2004"Pinuonan ining nasabing karera nin mga sakayan mga alas otso na nin aga duman sa Banwaan kan Casiguran bilang iyo an Starting line asin nagtapos ini sa Rompeolas bilang iyo an Finish line. Maogmahon an ginibong Bangkarerahan ta ini pig-partisiparan kan mga para-sira na hale pa sa iba-ibang lugar digdi sa Sorsogon. Burugsayan an paagui kan karera, kaya talagang maogma ini para sa mga partisipantes asin sa mga para hiling.

Alas Dos y Media na nin haponkan poonan an pinaka ma-kolor na aktibidad kan selebrasyon, iyan daing iba kundi an "Pantomina sa Tinampo", pinuonan ini duman sa may Sorsogon Natinal High School, paduman sa kahalabaan kan Magsaysay Avenue asin Rizal Street asin nagtapos sa Capitol Park. Talagang naging maogma asin ma-kolor as nasabing sarayaw ta ini pig partisiparan kan manlain-lain na delegasyon hale sa iba-ibang munisipyo arog kan, JUBAN, GUBAT, BARCELONA, BULUSAN, IROSIN, BULAN, STA.MAGDALENA, CASTILLA, PILAR, DONSOL asin an PRIETO DIAZ. Bako sana iba ibang Munispyo an yaon digdi kundi pati na an opisina arog baga kan Department of Education (DepEd),Sorsogon Water District asin GSIS. Siring man an mga eskwelahan arog kan Sorsogon State College (dating Trade)asin an Sorsogon National High School. Pigpartisiparan man ini kan mga taga East,West asin BACON Distict kan Ciudad nin Sorsogon. Puwera pa kaiyan. maging an ibang Baranggay nag partisipar sa nasabing PANTOMINA SA TINAMPO. Naging makolor nin marhay an Sorsogon kan hapon na ito dara kan mga magayon asin ma-kolor na bado kan mga para sayaw. Halos mga duwang oras an hinaloy kan nasabi ng Pantomina sa Tinampo. Napano que tawo an kahalabaan kan Magsaysay asin Rizal Street tanganing hilingon na mga magagayon na kunday kan mga parasayaw kan Pantomina. Maski na ngani paragal-pagal an mga para sayaw, pero mahihiling mo an kaogmahan sa sa indang mga pandok ta sinda naka partisipar sa pamosong sayaw kan mga BIKOLANO an Pantomina. Hagad ko na sa mga masunod pang KASANGGAYAHAN FESTIVAL mas lalo tang Patitibayon an istorya asin kulturang Sorsoganon, saro na ngani digdi ini na "PANTOMINA SA TINAMPO".

Sa mga Sorsoguenos sa iba ibang runa kan quinab-an, kuta nahatodan ko kamo kan mga pangyayari digdi sa satuyang Probinsiya kan mga nakaaging semana. Salamotonon kan saindong pag bisita digdi sa http://www.sorsogonweb.com asin digdi sa Sorsogon Update, Dios mabalos asin sa guiraray Maogmang Kasanggayahan sa gabos.